Shu kunlarda AQSHning Nyu-York shahrida BMT Bosh Assambleyasining Oliy darajadagi haftaligi bo‘lib o‘tmoqda. Har yili o‘tkaziladigan ushbu nufuzli yig‘inga dunyoning turli burchagidan davlat rahbarlari tashrif buyuradi.

Yuqori darajadagi haftaning asosiy voqeasi dunyo yetakchilarining bahs-munozaralari hisoblanadi. Bu galgi tadbirda ham dolzarb masalalar ko‘rib chiqiladi. 

Tadbirda BMT Bosh kotibi Antoniu Guterrish va Bosh Assambleyaning 79-sessiyasi prezidenti Filemon Yang nutq so‘zlashi kutilmoqda. Shuningdek, xalqaro yig‘inda BMTning asosiy organi - Xavfsizlik Kengashi dunyoning dolzarb muammolarini muhokama qilishni davom ettiradi. 

“Ukrainada tinchlik va xavfsizlikni saqlash” mavzusidagi uchrashuv bugun bo‘lib o‘tishi rejalashtirilgan. Chorshanba kuni xalqaro tinchlik va xavfsizlikni saqlash masalasi bo‘yicha ochiq muloqot bo‘lib o‘tadi, payshanba kuni esa Rossiya TIV e’lon qilganidek, “Shimoliy oqim” gaz quvurlarida sabotaj bo‘yicha yig‘ilish bo‘lib o‘tadi. Juma kuni Xavfsizlik Kengashi a’zolari Yaqin Sharqdagi vaziyatni muhokama qiladi.

Yuqori darajadagi hafta davomida mamlakat rahbarlari o‘rtasida muhokama qilinadigan asosiy mavzulardan biri Ukraina inqirozi bo‘lishi shubhasiz. Unda muammoni faqat diplomatik yo‘l bilan hal qilish yo‘llari ko‘rib chiqiladi. Biroq  vaziyatni yanada keskinlashtirish masalasi  ham muhokama qilinishi mumkin. Masalan, bir qator ommaviy axborot vositalarining fikricha, AQSH va Buyuk Britaniya Kiyevga Bosh Assambleyada Rossiyaning hududiga chuqurroq zarba berish uchun ruxsat berishi ham mumkin.

Hafta davomida muhokama markazida yana bir muhim mavzu - Yaqin Sharqdagi vaziyatning keskinlashuvi, xususan, G‘azo sektoridagi deyarli bir yildan beri davom etayotgan ziddiyatga bag‘ishlanadi. Chunki, o‘tgan davr mobaynida Xavfsizlik Kengashining nizoni to‘xtatish va garovga olinganlarni ozod qilishga ko‘maklashish bo‘yicha  urinishlari besamar ketdi.

S.Rahimov, O‘zA