19 fevral kuni Inson huquqlari bo'yicha O'zbekiston Respublikasi Milliy markazi Brayl alifbosida chop etilgan O'zbekiston Respublikasi Konstitutsiyasi va “Nogironligi bo'lgan shaxslarning huquqlari to'g'risida”gi O'zbekiston Respublikasi Qonuni, shuningdek, davlat tilidagi “BMTning nogironlar huquqlari to'g'risidagi konventsiyasi” o'quv qo'llanmasi taqdimotini o'tkazdi. Tadbir YEXHTning O'zbekistondagi loyihalari muvofiqlashtiruvchisi bilan hamkorlikda tashkil etildi.

Taqdimotda Inson huquqlari bo'yicha O'zbekiston Respublikasi Milliy markazi direktori Akmal Saidov, YEXHTning O'zbekistondagi loyihalari muvofiqlashtiruvchisi elchi Jon MakGregor so'zga chiqdi. Ular tadbir ishtirokchilarini Brayl alifbosida nashr etilgan yangi kitob bilan tanishtirdilar.

Tadbirda ta'kidlanganidek, mamlakatimizda birinchi marta Brayl alifbosida O'zbekiston Respublikasining Konstitutsiyasi rasmiy nashri hamda 2020 yil 15 oktyabrda qabul qilingan “Nogironligi bo'lgan shaxslarning huquqlari to'g'risidagi” Qonun nashr etildi.

Ushbu nashrlar Inson huquqlari bo'yicha O'zbekiston Respublikasi Milliy strategiyasini amalga oshirish doirasida Inson huquqlari bo'yicha O'zbekiston Respublikasi Milliy markazi tomonidan YEXHTning O'zbekistondagi loyihalari muvofiqlashtiruvchisi ko'magi bilan chop etildi.

O'zbekistonda nogironligi bo'lgan shaxslar, yoshlar, ayollar va keksalarni ijtimoiy himoya qilish inson huquqlari va erkinliklari sohasidagi davlat siyosatining ustuvor yo'nalishi hisoblanadi.

Konstitutsiyamizning IX bobi fuqarolarning ijtimoiy va iqtisodiy huquqlarini kafolatlaydi. Asosiy Qonunimizning 14-moddasiga binoan, davlat o'z faoliyatini inson va jamiyat farovonligini ko'zlab, ijtimoiy adolat va qonuniylik printsiplari asosida amalga oshiradi. Fuqarolarni ijtimoiy himoya qilish davlat faoliyatining asosiy mezonlaridandir.

Mamlakatimizda nogironligi bo'lgan shaxslar huquqlarini himoya qilish sohasidagi davlat siyosatining ustuvor yo'nalishlaridan biri sifatida imkoniyati cheklangan shaxslarga O'zbekiston Respublikasi Konstitutsiyasida nazarda tutilgan shaxsiy, siyosiy, iqtisodiy, ijtimoiy, madaniy huquq va erkinliklarni amalga oshirishda xalqaro huquqning umume'tirof etilgan printsiplari va normalari, shuningdek O'zbekistonning xalqaro shartnomalariga muvofiq boshqa fuqarolar bilan teng imkoniyatlar ta'minlanmoqda.

Nogironligi bo'lgan shaxslar huquqlarini jamiyat hayotining siyosiy-huquqiy, ijtimoiy-iqtisodiy va madaniy sohalarida himoya qilish asosida qanday vaziyat bo'lishi, shu jumladan, nogironligi borligidan qat'i nazar, insonni kamsitmaslik printsipi yotadi.

O'zbekiston Respublikasini rivojlantirishning beshta ustuvor yo'nalishi bo'yicha Harakatlar strategiyasini amalga oshirish doirasida nogironlarning ijtimoiy himoyasi va tengligini kafolatlaydigan bir qator qonunlar qabul qilindi. Xususan, 2020 yil 15 oktyabrda qabul qilingan “Nogironligi bo'lgan shaxslarning huquqlari to'g'risida”gi Qonun nogironlarning huquqlarini belgilaydigan asosiy qonunchilik hujjati hisoblanadi.

Shuni alohida ta'kidlash joizki, ushbu Qonun nogironligi bo'lgan shaxslar uchun mamlakat hayotining barcha jabhalarida kamsitilmasdan, jamiyatning boshqa a'zolari bilan teng ravishda ishtirok etishda katta imkoniyatlar yaratadi.

“Nogironligi bo'lgan shaxslarning huquqlari to'g'risida”gi Qonunning qabul qilinishi nogironligi bo'lgan shaxslarning huquqlarini himoya qilish sohasida zamonaviy usullar va xalqaro standartlarni joriy etishga, BMTning Nogironlar huquqlari to'g'risidagi konventsiyasining asosiy qoidalarini amalga oshirishga, shuningdek Barqaror rivojlanish maqsadlarining “Hech kimni ortda qoldirmang” tamoyilini amalga oshirishga yordam beradi.

BMTning Inson huquqlari bo'yicha oliy komissari Boshqarmasi tomonidan nashr qilingan “BMTning Nogironlar huquqlari to'g'risidagi konventsiyasi” o'quv-uslubiy qo'llanmasi Konventsiyaning asosiy qoidalari, uni ratifikatsiya qilish, amalga oshirish va monitoring qilish jarayonlari to'g'risida asosiy ma'lumotlarni o'z ichiga oladi. Ushbu o'quv ko'llanma ham Inson huquqlari bo'yicha O'zbekiston Respublikasi Milliy strategiyasi doirasida o'zbek tilida chop etildi.

Brayl alifbosida nashr etilgan O'zbekiston Respublikasi Konstitutsiyasi, “Nogironligi bo'lgan shaxslarning huquqlari to'g'risida”gi Qonun, shuningdek “BMTning Nogironlar huquqlari to'g'risidagi konventsiyasi” o'quv qo'llanmasi mamlakatimizda nogironligi bo'lgan shaxslarning huquqlari, erkinliklari va qonuniy manfaatlarini ta'minlash va amalga oshirishga xizmat qiladi.

Taqdimotda parlament a'zolari, nogironligi bo'lgan shaxslar muammolari bilan shug'ullanadigan tashkilotlar, davlat organlari, ta'lim muassasalari, fuqarolik jamiyati institutlari, ommaviy axborot vositalari hamda xalqaro tashkilotlar va xorijiy davlatlar elchixonalari vakillari ishtirok etdi.

Inson huquqlari bo'yicha
O'zbekiston Respublikasi
Milliy markazining
matbuot xizmati