Respublikachi senator Mayk Li AQSh Senatiga «BMT tarkibidan butunlay chiqib ketish» haqidagi qonun loyihasini kiritdi. Kongress yuqori palatasi saytida chop etilgan press-relizga ko‘ra, tashabbus muallifi Qo‘shma Shtatlar BMT tarkibidan chiqishi va uni moliyalashtirishni to‘xtatishi kerak, deb hisoblaydi.

Qonun loyihasining asosiy elementlari:

- 1945 yilda Kongress tomonidan qabul qilingan Birlashgan Millatlar Tashkiloti faoliyatida ishtirok etish to‘g‘risidagi qonun va BMT Bosh qarorgohi (Nyu-York shahrida joylashgan) to‘g‘risidagi bitim kabi asosiy hujjatlarni bekor qilish;

- Qo‘shma Shtatlar tomonidan BMT faoliyatini moliyalashtirishning barcha shakllarini, shu jumladan majburiy va ixtiyoriy badallarni to‘xtatish;

- AQSh harbiylarining BMT tinchlikparvar operatsiyalarida har qanday ishtirokini taqiqlash;

- Jahon sog‘liqni saqlash tashkiloti (JSST) va BMT konvensiyalaridan rasman chiqish;

- BMT bilan kelajakdagi har qanday hamkorlikning Senat tomonidan ma’qullanishi.

«Amerikaliklarning mashaqqat bilan ishlab topgan pullari bizning qadriyatlarimizga qarshi kurashuvchi, zolimlarga yordamlashuvchi, ittifoqchilarga xiyonat qiladigan va mutaassiblikni yoyadigan tashabbuslarga yo‘naltirildi. Kelajakda BMT bilan hamkorlik faqat bizning shartlarimiz bo‘yicha bo‘lishi kerak», dedi Li.

«BMT bizning ishonchimizga qayta-qayta xiyonat qildi va biz ularning sog‘in sigiriga aylanib, o‘z milliy xavfsizligimiz va manfaatlarimizga putur yetkaza olmaymiz», dedi tashabbusni qo‘llab-quvvatlagan senator Marsha Blekbern. Uning so‘zlariga ko‘ra, qonun bilan AQSh BMT faoliyatini moliyalashtirishni butunlay to‘xtatib qo‘yadi va «bu tashkilotni HAMAS va Xitoy Kommunistik partiyasi terrorchilari yonini olgani uchun javobgarlikka tortadi».

Vakillar palatasining ikki nafar respublikachisi ham qonun loyihasini Kongressning quyi palatasiga taqdim etadi. Ulardan biri Chip Roy BMTni HAMASni qo‘llab-quvvatlashda va AQSh ittifoqchisi bo‘lgan Isroilni nishonga olishda, shuningdek, «iqlim talvasasini tarqatishda» va «Xitoyning majburiy abort va sterilizatsiya dasturlarini yashirishda» aybladi.

«BMT nimaga erishdi? Barcha pul va e’tiborga qaramay, bu buzuq globalistik tashkilot o‘nlab yillar davomida urushlar, genotsidlar, inson huquqlari buzilishi va hatto pandemiyalarning oldini ololmadi», dedi Roy.

AQSh Xalqaro aloqalar kengashi ma’lumotlariga ko‘ra, Qo‘shma Shtatlar 2022 yilda BMTga 18 milliard dollar xayriya qilgan, bu tashkilot budjetining uchdan bir qismini tashkil etgan.

Kun.uz