Joriy yilning 17-20-mart kunlari Yevropa Ittifoqining Iqtisodiy va Ijtimoiy Qo‘mitasi tomonidan Bryussel shahrida “Fuqarolik jamiyati haftaligi – 2025” xalqaro tadbirlari o‘tkazilmoqda. Ushbu nufuzli haftalikda O‘zbekiston fuqarolik jamiyati delegatsiyasi, jumladan  “Taraqqiyot strategiyasi” markazi vakillari ishtirok etmoqda.

Xalqaro tadbir inklyuzivlik, demokratik ishtirok va hamkorlikni rivojlantirish kabi dolzarb masalalarga bag‘ishlanib, global miqyosda fuqarolik jamiyatining o‘rni va roli, innovatsion yondashuvlar hamda ilg‘or tajribalarni muhokama qilish uchun muhim maydonga aylanmoqda.

Tadbir doirasida Yevropaning barcha mamlakatlaridan yetakchi fuqarolik jamiyati institutlari vakillari, Yevropa Ittifoqining tegishli idoralari va a’zo davlatlar hukumat vakillari, tadqiqotchilar, ommaviy axborot vositalari hamda xalqaro tashkilotlar mutaxassislari ishtirok etmoqda. Ular jamiyatning turli qatlamlarini jalb etgan holda, fuqarolik jamiyatining rivojlanishi, demokratik institutlarni mustahkamlash va fuqarolarning siyosiy jarayonlardagi ishtirokini oshirish yo‘nalishlarida tajrıba almashmoqda.

Mazkur xalqaro tadbirlarga O‘zbekiston fuqarolik jamiyati delegatsiyasi ham taklif etilgan bo‘lib, ishtirokchilar nodavlat notijorat tashkilotlari va boshqa fuqarolik jamiyati institutlarining faoliyatini yanada takomillashtirish, ilg‘or xorijiy tajribani o‘rganish hamda o‘zaro hamkorlikni kuchaytirish imkoniyatlarini muhokama qilmoqda. Jumladan, delegatsiya O‘zbekistonda amalga oshirilayotgan demokratik islohotlar, fuqarolik jamiyatining mustahkamlanishi va inklyuziv jamiyat barpo etish yo‘nalishidagi yutuqlar, shuningdek, mavjud muammolar va kelgusidagi ustuvor vazifalar haqida xalqaro hamjamiyat bilan fikr almashmoqda.

Tadbir davomida O‘zbekiston delegatsiyasi xorijiy ekspertlar bilan tajriba almashish, qo‘shma loyihalarni amalga oshirish istiqbollarini muhokama qilish, shuningdek, fuqarolik jamiyatining rolini oshirishga qaratilgan innovatsion tashabbuslarni ilgari surish imkoniyatiga ega bo‘lmoqda. Mazkur xalqaro hamkorlik mamlakatimizda fuqarolik jamiyatini rivojlantirishning yangi bosqichiga zamin yaratishi va demokratik jarayonlarni yanada chuqurlashtirishga xizmat qilishi kutilmoqda.

 “Taraqqiyot strategiyasi” markazi
Axborot xizmati