Хотира ва қадрлаш куни муносабати билан Ўзбекистоннинг Бенилюкс мамлакатларидаги элчихонаси дипломатлари Нидерландиянинг Лёйсден шаҳридаги "Растхоф" қабристони ҳудудида жойлашган "Совет шон-шараф майдони" хотира хиёбонида бўлиб ўтган анъанавий маросимда иштирок этди. 

"Дунё" хабарига кўра, унда Нидерландиянинг "Совет шон-шараф майдони" жамғармаси кўнгиллилари, шу жумладан, маҳаллий олий ўқув юртлари талабалари ҳамда мактаб ўқувчилари, Нидерландияда истиқомат қилаётган ватандошлар қатнашди.

Тадбир давомида Иккинчи жаҳон урушида Нидерландияда қурбон бўлиб, мазкур хотира майдонида дафн этилган 865 нафар совет аскарлари, шу жумладан, ўзбекистонлик 101 нафар аскарнинг қабрларига гул қўйиш маросими бўлиб ўтди.

Нидерландиянинг "Совет шон-шараф майдони" жамғармаси бошқарув кенгаши раиси Ремко Рейдинг ўз нутқида, Лёйсден шаҳарчасида дафн этилган кўплаб ўзбек аскарлари қабрларига гул қўйиш орқали уларни руҳига ҳурмат кўрсатиш яхши анъанага айланганини таъкидлаб ўтди. "Бу орқали биз Иккинчи жаҳон уруши йилларида катта қурбонликни бошдан кечирган ўзбек аскарлари хотирасини ҳурмат билан яна бир бор ёдга оламиз ва уларнинг номларини унутилмаслигига ва абадий сақланишига ҳаракат қиламиз", деди у.

Тадбирда иштирок этган ватандошлар ушбу тадбир юрт ҳимояси ва унинг тинчлиги учун ўз жонларини фидо қилган 101 нафар ўзбекистонликлар хотирасини яна бир бор ёдга олиш, уларнинг ҳаққига дуо қилиш ва номларини ҳурмат ва миннатдорлик билан эслаш бугунги ёш авлодларнинг бурчи эканлигини қайд этдилар.

Шундан сўнг уруш қурбонлари руҳларига бағишлаб Қуръон тиловат қилинди.

Kun.uz