18-mart kuni Inson huquqlari bo‘yicha O‘zbekiston Respublikasi Milliy markazi direktori o‘rinbosari Dilnoza Muratova bilan BMTning Terrorizmga qarshi kurash boshqarmasi dasturlarini boshqarish bo‘yicha katta maslahatchisi Mehdi Knani o‘rtasida uchrashuv bo‘lib o‘tdi.

Uchrashuvda BMTning Terrorizmga qarshi kurash boshqarmasi dasturlarini boshqarish bo‘yicha maslahatchisi Dmitriy Ponomarev, BMTning Terrorizmga qarshi kurash boshqarmasi dasturlarini boshqarish bo‘yicha Markaziy Osiyodagi maslahatchisi Sanoat Jumayeva, shuningdek, Inson huquqlari bo‘yicha O‘zbekiston Respublikasi Milliy markazi Xalqaro hamkorlik bo‘limi boshlig‘i Iqbol Abdumajidov, Milliy markaz mas’ul xodimlari Abbosbek Nabiyev va Asilbek Mirjalilov ham ishtirok etdi.

O‘zaro muloqot asnosida terrorizmga qarshi kurash doirasida inson huquqlarini himoya qilish sohasida hamkorlik istiqbollari muhokama qilindi. Bu borada tajriba almashish va birgalikdagi sa’y-harakatlarni muvofiqlashtirish masalalari ko‘rib chiqildi.

Uchrashuv avvalida Inson huquqlari bo‘yicha O‘zbekiston Respublikasi Milliy markazi direktori o‘rinbosari D.Muratova Milliy markaz faoliyatining asosiy yo‘nalishlari va ustuvor vazifalari to‘g‘risida mehmonlarga atroflicha ma’lumot berdi. Inson huquqlari sohasidagi xalqaro standartlarni amalga oshirish borasida erishilgan yutuqlarga e’tibor qaratilib, O‘zbekiston BMTning inson huquqlari sohasidagi 18 ta asosiy xalqaro shartnomasidan 11 tasining to‘laqonli ishtirokchisi ekani qayd etildi.

O‘zbekiston zimmasiga olgan xalqaro majburiyatlarni bajarish doirasida Milliy harakat rejalarini ishlab chiqish, xalqaro majburiyatlarning bajarilishini muntazam monitoring qilish bo‘yicha izchil ishlar olib borilayotgani ta’kidlandi. Shuningdek, mamlakatning inson huquqlarini himoya qilish va rag‘batlantirish borasidagi aniq yutuqlari haqida ma’lumot berildi.

O‘z navbatida, BMTning Terrorizmga qarshi kurash boshqarmasi dasturlarini boshqarish bo‘yicha katta maslahatchisi Mehdi Knani O‘zbekiston tomoni taqdim etgan to‘liq ma’lumot uchun chuqur minnatdorlik bildirdi. O‘zbekiston va Terrorizmga qarshi kurash boshqarmasi o‘rtasida o‘zaro hamkorlikning barqaror mexanizmlari shakllanganini, bu esa ikki tomonlama hamkorlikning yuqori darajadagi ishonchliligi va samaradorligidan dalolat berishini alohida ta’kidladi.

Shu bilan birga, Mehdi Knani O‘zbekiston Tashqi ishlar vazirligidan tegishli vazirlik va idoralar bilan maslahatlashuvlar shaklida ekspert yordamini ko‘rsatish bo‘yicha rasmiy so‘rov olingani, shuningdek, Yevropa Ittifoqi tomonidan moliyalashtiriladigan va BMT tuzilmalari tomonidan amalga oshirilayotgan “Yevropa Ittifoqi – BMT vositasi” loyihasi doirasida texnik yordamning keng qamrovli to‘plami taqdim etilgani haqida ma’lumot berdi.

Ushbu loyihani amaliyotga tatbiq etish bo‘yicha samarali hamkorlikka ishonch bildirildi. Loyiha davomida Xalqaro islom akademiyasi va O‘zbekiston huquqni muhofaza qilish organlari bilan o‘zaro hamkorlikka alohida e’tibor qaratiladi.

Uchrashuvda BMTning Terrorizmga qarshi kurash boshqarmasi dasturlarni boshqarish bo‘yicha maslahatchisi D. Ponomarev hozirgi vaqtda BMT Terrorizmga qarshi kurash boshqarmasi O‘zbekiston bilan hamkorlikni ham qamrab olgan holda 14 ta global dasturni amalga oshirayotganini ma’lum qildi. Shuningdek, “Yevropa Ittifoqi – BMT vositasi” loyihasi terrorizm tahdidlari kuchayib borayotgan davlatlarga ko‘maklashishga qaratilganini alohida ta’kidladi.

D.Ponomarev “Yevropa Ittifoqi – BMT vositasi” loyihasining konseptual asoslarini batafsil tushuntirib, uning asosiy yo‘nalishlari haqida ma’lumot berdi. Ushbu loyiha doirasidagi faoliyat faqat qabul qiluvchi mamlakatlarning rasmiy murojaatlari asosida amalga oshiriladi.

BMTning Markaziy Osiyodagi Terrorizmga qarshi kurash boshqarmasi dasturlarini boshqarish bo‘yicha maslahatchisi S.Jumayeva bu boradagi salohiyatni oshirish chora-tadbirlariga e’tibor qaratgan holda, mintaqadagi Terrorizmga qarshi kurash boshqarmasi faoliyati haqida ma’lumot berdi.

Uning so‘zlariga ko‘ra, BMTning Markaziy Osiyodagi Terrorizmga qarshi kurash boshqarmasi terrorizmga qarshi kurash sohasida mintaqaviy hamkorlikni mustahkamlash maqsadida milliy va xalqaro hamkorlar bilan ishlarni muvofiqlashtirish uchun katta sa’y-harakatlarni amalga oshirmoqda. Tegishli organlarning kasbiy tayyorgarligini yaxshilash, tajriba va axborot almashish mexanizmlarini rivojlantirish masalalariga alohida e’tibor qaratilmoqda.

Suhbat yakunida O‘zbekiston tomonidan bildirilgan o‘zaro hamkorlikka oid tashabbus va takliflar BMTning Terrorizmga qarshi kurash boshqarmasi tomonidan to‘liq qo‘llab-quvvatlandi. Tomonlar ushbu takliflarni amalga oshirishda yaqindan hamkorlik qilish va har tomonlama ko‘maklashishga tayyorligini bildirdi.

Inson huquqlari bo‘yicha

O‘zbekiston Respublikasi

Milliy markazining

matbuot xizmati