18 март куни Инсон ҳуқуқлари бўйича Ўзбекистон Республикаси Миллий маркази директори ўринбосари Дилноза Муратова билан БМТнинг Терроризмга қарши кураш бошқармаси дастурларини бошқариш бўйича катта маслаҳатчиси Меҳди Кнани ўртасида учрашув бўлиб ўтди.

Учрашувда БМТнинг Терроризмга қарши кураш бошқармаси дастурларини бошқариш бўйича маслаҳатчиси Дмитрий Пономарев, БМТнинг Терроризмга қарши кураш бошқармаси дастурларини бошқариш бўйича Марказий Осиёдаги маслаҳатчиси Саноат Жумаева, шунингдек, Инсон ҳуқуқлари бўйича Ўзбекистон Республикаси Миллий маркази Халқаро ҳамкорлик бўлими бошлиғи Иқбол Абдумажидов, Миллий марказ масъул ходимлари Аббосбек Набиев ва Асилбек Миржалилов ҳам иштирок этди.

Ўзаро мулоқот асносида терроризмга қарши кураш доирасида инсон ҳуқуқларини ҳимоя қилиш соҳасида ҳамкорлик истиқболлари муҳокама қилинди. Бу борада тажриба алмашиш ва биргаликдаги саъй-ҳаракатларни мувофиқлаштириш масалалари кўриб чиқилди.

Учрашув аввалида Инсон ҳуқуқлари бўйича Ўзбекистон Республикаси Миллий маркази директори ўринбосари Д.Муратова Миллий марказ фаолиятининг асосий йўналишлари ва устувор вазифалари тўғрисида меҳмонларга атрофлича маълумот берди. Инсон ҳуқуқлари соҳасидаги халқаро стандартларни амалга ошириш борасида эришилган ютуқларга эътибор қаратилиб, Ўзбекистон БМТнинг инсон ҳуқуқлари соҳасидаги 18 та асосий халқаро шартномасидан 11 тасининг тўлақонли иштирокчиси экани қайд этилди.

Ўзбекистон зиммасига олган халқаро мажбуриятларни бажариш доирасида Миллий ҳаракат режаларини ишлаб чиқиш, халқаро мажбуриятларнинг бажарилишини мунтазам мониторинг қилиш бўйича изчил ишлар олиб борилаётгани таъкидланди. Шунингдек, мамлакатнинг инсон ҳуқуқларини ҳимоя қилиш ва рағбатлантириш борасидаги аниқ ютуқлари ҳақида маълумот берилди.

Ўз навбатида, БМТнинг Терроризмга қарши кураш бошқармаси дастурларини бошқариш бўйича катта маслаҳатчиси Меҳди Кнани Ўзбекистон томони тақдим этган тўлиқ маълумот учун чуқур миннатдорлик билдирди. Ўзбекистон ва Терроризмга қарши кураш бошқармаси ўртасида ўзаро ҳамкорликнинг барқарор механизмлари шаклланганини, бу эса икки томонлама ҳамкорликнинг юқори даражадаги ишончлилиги ва самарадорлигидан далолат беришини алоҳида таъкидлади.

Шу билан бирга, Меҳди Кнани Ўзбекистон Ташқи ишлар вазирлигидан тегишли вазирлик ва идоралар билан маслаҳатлашувлар шаклида эксперт ёрдамини кўрсатиш бўйича расмий сўров олингани, шунингдек, Европа Иттифоқи томонидан молиялаштириладиган ва БМТ тузилмалари томонидан амалга оширилаётган “Европа Иттифоқи – БМТ воситаси” лойиҳаси доирасида техник ёрдамнинг кенг қамровли тўплами тақдим этилгани ҳақида маълумот берди.

Ушбу лойиҳани амалиётга татбиқ этиш бўйича самарали ҳамкорликка ишонч билдирилди. Лойиҳа давомида Халқаро ислом академияси ва Ўзбекистон ҳуқуқни муҳофаза қилиш органлари билан ўзаро ҳамкорликка алоҳида эътибор қаратилади.

Учрашувда БМТнинг Терроризмга қарши кураш бошқармаси дастурларни бошқариш бўйича маслаҳатчиси Д. Пономарев ҳозирги вақтда БМТ Терроризмга қарши кураш бошқармаси Ўзбекистон билан ҳамкорликни ҳам қамраб олган ҳолда 14 та глобал дастурни амалга ошираётганини маълум қилди. Шунингдек, “Европа Иттифоқи – БМТ воситаси” лойиҳаси терроризм таҳдидлари кучайиб бораётган давлатларга кўмаклашишга қаратилганини алоҳида таъкидлади.

Д.Пономарев “Европа Иттифоқи – БМТ воситаси” лойиҳасининг концептуал асосларини батафсил тушунтириб, унинг асосий йўналишлари ҳақида маълумот берди. Ушбу лойиҳа доирасидаги фаолият фақат қабул қилувчи мамлакатларнинг расмий мурожаатлари асосида амалга оширилади.

БМТнинг Марказий Осиёдаги Терроризмга қарши кураш бошқармаси дастурларини бошқариш бўйича маслаҳатчиси С.Жумаева бу борадаги салоҳиятни ошириш чора-тадбирларига эътибор қаратган ҳолда, минтақадаги Терроризмга қарши кураш бошқармаси фаолияти ҳақида маълумот берди.

Унинг сўзларига кўра, БМТнинг Марказий Осиёдаги Терроризмга қарши кураш бошқармаси терроризмга қарши кураш соҳасида минтақавий ҳамкорликни мустаҳкамлаш мақсадида миллий ва халқаро ҳамкорлар билан ишларни мувофиқлаштириш учун катта саъй-ҳаракатларни амалга оширмоқда. Тегишли органларнинг касбий тайёргарлигини яхшилаш, тажриба ва ахборот алмашиш механизмларини ривожлантириш масалаларига алоҳида эътибор қаратилмоқда.

Суҳбат якунида Ўзбекистон томонидан билдирилган ўзаро ҳамкорликка оид ташаббус ва таклифлар БМТнинг Терроризмга қарши кураш бошқармаси томонидан тўлиқ қўллаб-қувватланди. Томонлар ушбу таклифларни амалга оширишда яқиндан ҳамкорлик қилиш ва ҳар томонлама кўмаклашишга тайёрлигини билдирди.

Инсон ҳуқуқлари бўйича

Ўзбекистон Республикаси

Миллий марказининг

матбуот хизмати