18-mart kuni Inson huquqlari bo‘yicha O‘zbekiston Respublikasi Milliy markazida Milliy markaz rahbariyati bilan Yevropa Ittifoqining GSP+ dasturi bo‘yicha monitoring missiyasi delegatsiyasi o‘rtasida uchrashuv bo‘lib o‘tdi.

Uchrashuv GSP+ dasturini amalga oshirish doirasida O‘zbekiston Respublikasining inson huquqlarini himoya qilish va ta’minlash sohasidagi davlat siyosatining asosiy jihatlarini muhokama qilishga bag‘ishlandi. Inson huquqlari bo‘yicha O‘zbekiston Respublikasi Milliy markazi direktori o‘rinbosari D.Muratova Yevropa Komissiyasining Savdo departamenti boshlig‘i A. Boychuk va delegatsiya a’zolarini kutib oldi.

Uchrashuvda Yevropa Ittifoqi delegatsiyasi missiyasi rahbari o‘rinbosari M.Katserauskis, Yevropa Ittifoqi delegatsiyasi maslahatchilari, Yevropa Komissiyasi, Yevropa tashqi ishlar xizmati vakillari, shuningdek, Milliy markaz va Oliy Majlisning Inson huquqlari bo‘yicha vakili Kotibiyati mas’ul xodimlari ishtirok etdi.

D.Muratova o‘z so‘zining boshida O‘zbekistonda inson huquqlari sohasida amalga oshirilayotgan izchil islohotlar haqida ma’lumot berdi. Shuningdek, 2030-yilgacha mo‘ljallangan Inson huquqlari bo‘yicha O‘zbekiston Respublikasi Milliy strategiyasi loyihasi ishlab chiqilayotgani e’lon qilindi. Milliy markazning mamlakatimizning inson huquqlari sohasidagi xalqaro majburiyatlarini bajarishga ko‘maklashish borasidagi faoliyatiga alohida e’tibor qaratildi.

O‘zbekiston Respublikasi Oliy Majlisining Inson huquqlari bo‘yicha vakili (ombudsman) Kotibiyati mudiri T.Hayitov 2024-yil 15-noyabrdagi qonun bilan belgilangan Ombudsman institutining huquqiy maqomi haqida ma’lumot berdi. U fuqarolarning huquq va erkinliklarini ta’minlashda Ombudsman institutining vakolatlari kengaytirilgani, uning hududlardagi faoliyati va qiynoqlarning oldini olish bo‘yicha ishlar kuchaytirilganini ta’kidladi.

Yevropa Ittifoqi delegatsiyasi rahbari A.Boychuk Yevropa Ittifoqini qiziqtirgan bir qator masalalarga to‘xtaldi. Jumladan, fuqarolarni majburiy ko‘chirish holatlari, nodavlat tashkilotlarni ro‘yxatdan o‘tkazish tartibi, BMTning Qiynoqlarga qarshi konvensiyasiga Fakultativ protokolni implementatsiya va ratifikatsiya qilish sohasidagi ishlarning holati xususida fikr yuritildi.

Yevropa tomonining barcha savollariga batafsil javoblar berildi.

Uchrashuv yakunida Yevropa Ittifoqi delegatsiyasi taqdim etilgan to‘liq ma’lumotlar va barcha savollarga atroflicha javoblar uchun minnatdorchilik bildirdi.

Inson huquqlari bo‘yicha

O‘zbekiston Respublikasi

Milliy markazining

matbuot xizmati