19-mart kuni Inson huquqlar uyida Inson huquqlari bo‘yicha O‘zbekiston Respublikasi Milliy markazi hamda “Demokratlashtirish va inson huquqlari” jurnali tahririyati xodimlari o‘rtasida “Zakovat” intellektual o‘yini bo‘lib o‘tdi. Tadbir “Zakovat intellektual klubi” NNT bilan hamkorlikda o‘tkazildi.

Ushbu musobaqa, avvalo, “O‘zbekiston – 2030” strategiyasining Atrof-muhitni asrash va “yashil iqtisodiyot” yili doirasida amalga oshirilayotgan Davlat dasturi ijrosini ta’minlashga qaratildi. Shuningdek, intellektual bellashuv Milliy markaz direktorining yoshlar bilan uchrashuvi chog‘ida bildirgan tashabbusi asosida tashkil etildi.

“Zakovat” intellektual musobaqasi – nafaqat bilimni sinovdan o‘tkazish, balki tezkor fikrlash, mantiqiy tahlil qilish va jamoaviy hamjihatlikda ishlash qobiliyatini rivojlantirish imkoniyatidir. Shu ma’noda, tadbirning asosiy maqsadi – xodimlarning huquqiy, tarixiy va ilmiy dunyoqarashini kengaytirish, jamoaviy ishlash madaniyatini rivojlantirish hamda inson huquqlari sohasidagi bilimlarni mustahkamlashdan iborat.

Musobaqa qizg‘in bahslarga boy bo‘ldi. Ishtirokchilar bir nechta jamoaga bo‘linib, tarix, huquq, inson huquqlari, atrof-muhitni muhofaza qilish, umumbashariy qadriyatlar va zamonaviy ilm-fan yo‘nalishlari bo‘yicha savollarga javob berdi.

Har bir jamoa bilimdonlik, izlanuvchanlik va tafakkur kuchi borasida o‘zaro raqobat olib bordi. Ayniqsa, atrof-muhit muhofazasi va “yashil iqtisodiyot” mavzularidagi savollar ishtirokchilar orasida katta qiziqish uyg‘otdi. Har bir to‘g‘ri javob, ishonchli tahlil va mantiqiy fikrlash natijasida jamoalar qimmatli ballarni qo‘lga kiritib bordi.

G‘oliblarni aniqlashda jamoaviy hamkorlik, tezkor va aniq javoblar, mantiqiy fikrlash qobiliyati kabi mezonlar inobatga olindi. Qiziqarli va bahsli bellashuvlar natijasida eng yuqori natijani qayd etgan jamoa g‘olib deb topildi.

Musobaqa yakunida g‘olib bo‘lgan jamoa a’zolari hamda faol ishtirok etgan jamoa a’zolari ham Kasaba uyushma qo‘mitasi tomonidan diplom va esdalik sovg‘alari bilan taqdirlandi.

Tadbir so‘ngida ishtirokchilar o‘z fikr-mulohazalarini bildirib, bilim va tafakkurni sinovdan o‘tkazuvchi bu kabi intellektual bellashuvlar ko‘proq o‘tkazilishini qo‘llab-quvvatladilar.

Kelgusida Milliy markaz va hamkor tashkilotlar bilan birgalikda intellektual tadbirlarni davom ettirish rejalashtirilgan. Shu munosabat bilan tashkilotchilar Milliy markazning “Zakovat” intellektual musobaqalarida faol ishtirok etish istagida bo‘lgan barcha xodimlarini keyingi bellashuvlarga taklif qiladi.

Inson huquqlari bo‘yicha

O‘zbekiston Respublikasi

Milliy markazining

matbuot xizmati