19 март куни Инсон ҳуқуқлар уйида Инсон ҳуқуқлари бўйича Ўзбекистон Республикаси Миллий маркази ҳамда “Демократлаштириш ва инсон ҳуқуқлари” журнали таҳририяти ходимлари ўртасида “Заковат” интеллектуал ўйини бўлиб ўтди. Тадбир “Заковат интеллектуал клуби” ННТ билан ҳамкорликда ўтказилди.

Ушбу мусобақа, аввало, “Ўзбекистон – 2030” стратегиясининг Атроф-муҳитни асраш ва “яшил иқтисодиёт” йили доирасида амалга оширилаётган Давлат дастури ижросини таъминлашга қаратилди. Шунингдек, интеллектуал беллашув Миллий марказ директорининг ёшлар билан учрашуви чоғида билдирган ташаббуси асосида ташкил этилди.

“Заковат” интеллектуал мусобақаси – нафақат билимни синовдан ўтказиш, балки тезкор фикрлаш, мантиқий таҳлил қилиш ва жамоавий ҳамжиҳатликда ишлаш қобилиятини ривожлантириш имкониятидир. Шу маънода, тадбирнинг асосий мақсади – ходимларнинг ҳуқуқий, тарихий ва илмий дунёқарашини кенгайтириш, жамоавий ишлаш маданиятини ривожлантириш ҳамда инсон ҳуқуқлари соҳасидаги билимларни мустаҳкамлашдан иборат.

Мусобақа қизғин баҳсларга бой бўлди. Иштирокчилар бир нечта жамоага бўлиниб, тарих, ҳуқуқ, инсон ҳуқуқлари, атроф-муҳитни муҳофаза қилиш, умумбашарий қадриятлар ва замонавий илм-фан йўналишлари бўйича саволларга жавоб берди.

Ҳар бир жамоа билимдонлик, изланувчанлик ва тафаккур кучи борасида ўзаро рақобат олиб борди. Айниқса, атроф-муҳит муҳофазаси ва “яшил иқтисодиёт” мавзуларидаги саволлар иштирокчилар орасида катта қизиқиш уйғотди. Ҳар бир тўғри жавоб, ишончли таҳлил ва мантиқий фикрлаш натижасида жамоалар қимматли балларни қўлга киритиб борди.

Ғолибларни аниқлашда жамоавий ҳамкорлик, тезкор ва аниқ жавоблар, мантиқий фикрлаш қобилияти каби мезонлар инобатга олинди. Қизиқарли ва баҳсли беллашувлар натижасида энг юқори натижани қайд этган жамоа ғолиб деб топилди.

Мусобақа якунида ғолиб бўлган жамоа аъзолари ҳамда фаол иштирок этган жамоа аъзолари ҳам Касаба уюшма қўмитаси томонидан диплом ва эсдалик совғалари билан тақдирланди.

Тадбир сўнгида иштирокчилар ўз фикр-мулоҳазаларини билдириб, билим ва тафаккурни синовдан ўтказувчи бу каби интеллектуал беллашувлар кўпроқ ўтказилишини қўллаб-қувватладилар.

Келгусида Миллий марказ ва ҳамкор ташкилотлар билан биргаликда интеллектуал тадбирларни давом эттириш режалаштирилган. Шу муносабат билан ташкилотчилар Миллий марказнинг “Заковат” интеллектуал мусобақаларида фаол иштирок этиш истагида бўлган барча ходимларини кейинги беллашувларга таклиф қилади.

Инсон ҳуқуқлари бўйича

Ўзбекистон Республикаси

Миллий марказининг

матбуот хизмати