2022 yil 6 dekabr kuni Samarqand shahrida, “Inson huquqlari sohasidagi ta’lim” Global forumi doirasida “Inson huquqlari himoyasi uchun” ko‘krak nishoni sovrindorlarini taqdirlash marosimi o‘tkazildi. Tantanali tadbirni Inson huquqlari bo‘yicha O‘zbekiston Respublikasi Milliy markazi direktori Akmal Saidov kirish so‘zi bilan ochdi.

“Inson huquqlari himoyasi uchun” ko‘krak nishoni O‘zbekiston Respublikasi Prezidentining tashabbusi bilan 2020 yilda ta’sis etilgan. Bundan maqsad – inson huquqlari va erkinliklarini himoya qilishda katta hissa qo‘shgan fuqarolar va tashkilotlarni moddiy va ma’naviy rag‘batlantirish hamda taqdirlash, bu faoliyatni amalga oshirishda o‘rnak bo‘layotganlar namunasini, ularning tajribasini ommalashtirishdan iborat.

         Ko‘krak nishoni bilan inson huquqlari va erkinliklarini himoya qilishdagi xizmati, inson huquqlarini targ‘ib qilishdagi faolligi, inson huquqlari sohasidagi ta’lim, yoshlar o‘rtasida inson huquqlarini himoya qilish an’analarini rivojlantirishga qo‘shgan hissasi, inson huquqlarini himoya qiluvchi tashkilotlarni rivojlantirish va boshqarishdagi salmoqli yutuqlari, inson huquqlari sohasidagi samarali ilmiy faoliyati uchun O‘zbekiston Respublikasi fuqarolari taqdirlanadi.

         “Inson huquqlari himoyasi uchun” ko‘krak nishoni bilan chet el fuqarolari va fuqaroligi bo‘lmagan shaxslar, shuningdek, inson huquqlarini himoya qilish sohasida faoliyat olib borayotgan tashkilotlar ham taqdirlanishi mumkin.

         Har yili 10 dekabr – Xalqaro inson huquqlari kuni arafasida ko‘krak nishoni va uning guvohnomasi tantanali tarzda topshiriladi. Joriy yilda ushbu mukofotga 6 nafar hamyurtimiz, 2 nafar chet el fuqarosi va 2 ta nodavlat notijorat tashkiloti sazovor bo‘ldi. Xususan:

• “Ijtimoiy fikr” respublika jamoatchilik fikrini o‘rganish Markazi direktorining birinchi o‘rinbosari Marat Xadjimuxamedov – inson huquqlari va erkinliklarini himoya qilish sohasidagi zamonaviy tadqiqot amaliyotini shakllantirishga qo‘shgan munosib hissasi;
• O‘zbekiston Respublikasi Yoshlar ishlari agentligining Surxondaryo viloyati boshqarmasi boshlig‘i Jamshidjon Choriev – yoshlar huquqlarini himoya qilishdagi samarali faoliyati;
• O‘zbekiston kasaba uyushmalari Federatsiyasi apparatining Yuridik bo‘limi mudiri Hamidulla Premkulov – aholining mehnat huquqlari va ijtimoiy-iqtisodiy manfaatlarini himoya qilishdagi faolligi;
• O‘zbekiston Nogironlar jamiyati – nogironligi bo‘lgan shaxslarni ijtimoiy himoya qilishdagi faolligi;
• “Barqaror hayot” ijtimoiy-ma’rifat markazi direktori Oliya Ilmuradova – ayollar va bolalar huquqlarini himoya qilishdagi ko‘p yillik samarali faoliyati;
• “UMNICHKA” Nodavlat ta’lim muassasasi rahbari Shahnoza Ikramova – bolalar huqularini himoya qilishdagi faol ishtiroki;
• O‘zbekiston Jurnalistlari ijodiy uyushmasi – jurnalistlarning huquqlari, sha’ni va qadr-qimmatini, qonuniy huquq va manfaatlarini himoya qilishga qo‘shgan hissasi;
• Toshkent davlat yuridik universiteti Xalqaro huquq va inson huquqlari kafedrasi professori Govxerjan Yuldasheva – inson huquqlarini himoya qilish sohasidagi o‘quv va ilmiy faoliyati;
• Tallin universiteti Boshqaruv, huquq va jamiyat akademiyasi faxriy professori Reyn Myullerson – inson huquqlari sohasidagi xalqaro hamkorlik, ilmiy va o‘quv ishlari;
• BMT Inson huquqlari bo‘yicha Oliy komissari Boshqarmasining Markaziy Osiyodagi mintaqaviy vakolatxonasi rahbari Rishard Komenda – inson huquqlarini himoya qilish va ta’minlash sohasidagi xalqaro hamkorligi uchun ushbu mukofot bilan taqdirlandilar.

“Inson huquqlari himoyasi uchun” ko‘krak nishonini o‘z sohiblariga Inson huquqlari bo‘yicha O‘zbekiston Respublikasi Milliy markazi direktori Akmal Saidov topshirdi.

Ma’lumot uchun: 2020-2021 yillarda nodavlat notijorat tashkilotlari va ular vakillarining 12 nafari, davlat tashkilotlari hamda oliy ta’lim muassasalari xodimlarining 8 nafari, xalqaro va xorijiy tashkilotlar vakillarining 8 nafari “Inson huquqlari himoyasi uchun” ko‘krak nishoni bilan taqdirlangan.

Inson huquqlari bo‘yicha
O‘zbekiston Respublikasi
Milliy markazining
matbuot xizmati