Олий Мажлис Сенати Фан, таълим ва соғлиқни сақлаш масалалари қўмитаси ишчи гуруҳи йиғилишида Қонунчилик палатаси томонидан 2019 йил 22 июль куни қабул қилинган “Илм-фан ва илмий фаолият тўғрисида”ги Қонун муҳокама қилинди. Бу ҳақда Олий Мажлис Сенати ахборот хизмати хабар бермоқда.

 

Миллий иқтисодиёт самарадорлигининг асосини табиий ва меҳнат ресурслари қаторида мамлакатнинг илмий-техникавий салоҳияти ҳам ташкил этади. Жамият ижтимоий-иқтисодий ҳаётининг сифат жиҳатидан янги даражага кўтарилаётгани илмий фаолиятнинг аҳамиятини янада оширди.

 

Олий таълим муассасаларида 26 476 нафар профессор ва ўқитувчи фаолият юритмоқда, уларнинг 9 636 нафари илмий даражаларга эга. 2018-2019 йилларда 1 382 нафар тадқиқотчи диссертация ҳимоя қилган. Бироқ соҳада мавжуд камчилик ва муаммолар, аввало, унинг қонунчилик негизини янгилаш ва мустаҳкамлашни тақозо этмоқда.  

 

“Илм-фан ва илмий фаолият тўғрисида”ги Қонун бу йўналишда қўйиладиган муҳим қадам бўлиши лозим.

 

Ҳужжатда соҳадаги фаолиятнинг:

 

- илмий ижод ва ахборот эркинлиги;

 

- самарадорлик, манфаатдорлик ва рағбатлантириш;

 

- холис илмий экспертиза;

 

- инсон ҳаёти ва саломатлигига зарар етказмаслик каби асосий тамойиллар мустаҳкамлаб қўйилмоқда.

 

Соҳанинг асосий йўналишлари қаторида илм-фан ва илмий фаолиятни ривожлантириш орқали миллий иқтисодиёт рақобатбардошлиги ва самарадорлигига эришиш, унинг устувор йўналишларини белгилаш ва ресурсларни мақсадли йўналтириш, давлат илмий дастурларини ишлаб чиқиш, асослантирилган ташаббус ва лойиҳаларни қўллаб-қувватлаш каби мақсадлар қайд этилмоқда.

 

Қонунда илм-фан ва илмий фаолият соҳасида давлат-хусусий шерикликни қўллаб-қувватлаш, илм-фанга интилиш ва унинг жозибадорлик муҳитини шакллантириш, ёшларни илмий фаолиятга жалб этиш, ёш истеъдод эгаларини тайёрлаб бориш каби йўналишларга ҳам урғу берилмоқда.

 

Манба: kun.uz