АР-РИЁД, 25 апрель. /"Дунё" АА/. Инсон ҳуқуқлари бўйича Миллий марказ директори Акмал Саидов бошчилигидаги Ўзбекистон делегацияси "Одам савдоси билан боғлиқ жиноятларга қарши курашишда ҳамкорликни мустаҳкамлаш" мавзусидаги халқаро симпозиумда иштирок этмоқда, деб хабар бермоқда "Дунё" АА мухбири.

Тадбир Саудия Арабистони Инсон ҳуқуқлари бўйича комиссияси (ИҲК) томонидан ташкил этилди.

Симпозиумнинг мақсади одам савдоси билан боғлиқ жиноятларга қарши курашиш бўйича миллий ва халқаро қонунчилик ҳамда институционал асосларни намойиш этишдан иборат. Тадбир, шунингдек, бундай жиноятларга қарши курашда стандарт асос бўлиб хизмат қилувчи минтақавий ва халқаро шартнома ҳамда конвенцияларни ўрганишга қаратилган.

Бундан ташқари, симпозиум ушбу турдаги жиноятларнинг кенг тарқалган шакллари, уларнинг замонавий ривожланиши, ҳимоя қилиш ва олдини олишнинг мақбул воситалари, шунингдек, уларга қарши курашиш бўйича илғор халқаро тажриба ва тажрибалардан фойдаланиш ҳақида хабардорликни оширишга қаратилган. Тадбирда одам савдосига қарши курашишнинг глобал муаммолари ва уларни бартараф этиш стратегияси, шунингдек, ушбу жиноятларга қарши курашишга қаратилган халқаро ҳамкорликка алоҳида эътибор қаратилди.

Симпозиумда халқаро ташкилотлар, жумладан, ЮНИСЕФ ва унинг Кўрфаз мамлакатларидаги ваколатхоналари, Саудия Арабистонидаги БМТ доимий координатори идораси, БМТнинг Наркотиклар ва жиноятчилик бўйича ташкилоти, Халқаро миграция ташкилоти, одам савдосига қарши кураш бўйича "Ibtisam" уюшмаси, шунингдек, мезбон мамлакатнинг давлат идоралари вакиллари иштирок этмоқда.

Анжуманда Ўзбекистон делегацияси раҳбари Акмал Саидов мамлакатимизда инсон ҳуқуқларини таъминлаш ва одам савдоси билан боғлиқ жиноятларга қарши курашиш тажрибаси мавзусида маъруза қилди.

У Ўзбекистоннинг инсон ҳуқуқлари бўйича миллий институтларининг инсон ҳуқуқларини ҳимоя қилиш соҳасидаги сўнгги ютуқлари, Инсон ҳуқуқлари бўйича Миллий марказнинг БМТ инсон ҳуқуқлари тузилмалари ва Ислом ҳамкорлик ташкилоти инсон ҳуқуқлари бўйича мустақил доимий комиссияси (ИҲТ ИҲМДК) билан яқин ҳамкорлиги ҳақида маълумот берди.

Хусусан, сўнгги йилларда Ўзбекистонда миллий қонунчилик базаси мустаҳкамлангани, жумладан, одам савдоси билан шуғулланувчиларга нисбатан қаттиқроқ жазо чоралари жорий этилгани, жабрланувчиларнинг ҳимояси кучайтирилгани таъкидланди.

Миллий қонунлар халқаро стандартларга мувофиқ қайта кўриб чиқилиб, одам савдоси бўйича ишлар аниқ белгиланди ва уларга тегишли жазо тайинланди.

Одам савдоси ва мажбурий меҳнатга қарши курашиш, фуқароларнинг меҳнат ҳуқуқларини таъминлаш, мавжуд муаммоларни бартараф этиш мақсадида сўнгги 2 йилда 10 та норматив-ҳуқуқий ҳужжат, жумладан, 3 та қонун, 1 та Фармон, 2 та Ўзбекистон Президент қарори ва ҳукуматнинг 4 та қарори қабул қилингани таъкидланди.

Ўзбекистон Миллий реабилитация маркази ва нодавлат нотижорат ташкилотлари томонидан одам савдоси ва мажбурий меҳнат қурбонларини ҳимоя қилиш ва уларга кўмаклашиш борасида тизимли ишлар амалга оширилмоқда.

2023 йилда Марказ 2278 дан ортиқ жабрланганларга ёрдам кўрсатиб, уларнинг жамиятга қайта интеграциялашувига ёрдам бериш учун психологик, ҳуқуқий ва профессионал ёрдам кўрсатди.

Республикада ахборот тарғиботлари кенг йўлга қўйилган, хусусан, 239 та ахборот-тарғибот гуруҳлари тузилиб, жами 9807 та тарғибот тадбирлари ўтказилди.

Ўзбекистон халқаро меҳнат ташкилоти, АҚШ Давлат департаменти, БМТнинг Наркотиклар ва жиноятчилик бўйича бошқармаси каби халқаро ва хорижий ташкилотлар билан ушбу глобал муаммога жамоавий муносабатимизни кучайтириш учун фаол ҳамкорлик қилаётгани алоҳида таъкидланди.