18 март куни Тошкентда БМТ Хавфсизлик Кенгашининг "Аёллар, тинчлик ва хавфсизлик" номли 1325-сон резолюциясини амалга оширишдаги ютуқларни баҳолашга бағишланган Марказий Осиё давлатлари вакилларининг учрашуви бўлиб ўтди.

Тадбирда расмий делегатлар, экспертлар, фуқаролик жамияти фаоллари, халқаро ҳамкорлар, БМТ тузилмалари ва бошқа халқаро ташкилотлар вакиллари иштирок этди.

Учрашув давомида мамлакатлар томонидан 1325-сонли резолюцияни амалга ошириш доирасида Миллий ҳаракатлар режаларини бажариш бўйича эришилган ютуқлар тўғрисида ҳисоботлар тақдим этилди.

Тинчликни таъминлаш жараёнларида аёлларнинг ролини кучайтириш, можаролар шароитида аёллар ҳуқуқларини ҳимоя қилиш механизмларини такомиллаштириш, шунингдек, ушбу йўналишдаги институционал ва қонунчилик асосларини мустаҳкамлаш бўйича сезиларли ютуқларга эришилганлиги қайд этилди. Гендер тенгликни таъминлаш ва ушбу тузилмаларда аёллар иштирокини кенгайтириш учун ҳуқуқни муҳофаза қилиш органлари ва қуролли кучлар билан ишлашга алоҳида эътибор қаратилди.

Минтақа мамлакатлари ўртасида ҳамкорликни кучайтириш, илғор тажрибалар алмашиш, гендер тенгликни таъминлаш ва тинчликни мустаҳкамлаш бўйича қўшма ташаббусларни ишлаб чиқиш имконини берадиган 1325-сонли резолюция бўйича Минтақавий дастурни яратиш истиқболларига алоҳида аҳамият берилди. Иштирокчилар инқироз ва можаролар шароитида аёллар ва қизлар ҳуқуқларини ҳимоя қилишга қаратилган дастурлар самарадорлигини ошириш учун ҳамкорликда ишлаш зарурлигини таъкидладилар.

Минтақавий дастур ва Миллий ҳаракатлар режалари амалга оширилишини назорат қилиш учун минтақавий мувофиқлаштириш механизмини ташкил этиш таклиф қилинди.

Бундан ташқари, замонавий хатарлар ва устувор йўналишларни ҳисобга олган ҳолда янги Миллий ҳаракатлар режаларини ишлаб чиқиш масалалари муҳокама қилинди. Иштирокчилар тинчлик ўрнатиш соҳасида янги ёндашувларни жорий этиш, аёлларнинг иқтисодий имкониятларини кенгайтириш ва қарорлар қабул қилиш жараёнларида уларнинг фаол иштирокини таъминлаш муҳимлигини таъкидладилар.

Янги Миллий ҳаракатлар режаларига аёлларга нисбатан зўравонликнинг олдини олиш, уларнинг иқтисодий мустақиллигини ошириш, аёллар ва қизлар учун таълим дастурларини кенгайтириш бўйича кучайтирилган чора-тадбирларни киритиш таклиф этилди.

Иштирокчилар 1325-сонли резолюцияни амалга ошириш самарадорлигини яхшилаш учун фуқаролик жамияти ва ёшлар билан фаол ҳамкорлик қилиш зарурлигини қайд этдилар. Халқаро ташкилотлар вакиллари минтақа мамлакатларига янги стратегияларни ишлаб чиқиш ва жорий этишни техник ва экспертлар ёрдамини кўрсатиш орқали қўллаб-қувватлашга тайёрлигини билдирдилар.

Учрашув якунида томонлар Марказий Осиёда 1325-сонли резолюция мақсадларини янада илгари суриш учун ўзаро ҳамкорликни давом эттириш, энг яхши амалиётлар билан алмашиш ва саъй-ҳаракатларни мувофиқлаштириш бўйича келишиб олдилар. Бу борада тараққиётни кузатиб бориш ва ўзгарувчан шароитларга мос равишда стратегияларни мослаш учун мунтазам учрашувлар ва форумлар ўтказишга қарор қилинди.

Инсон ҳуқуқлари бўйича

Ўзбекистон Республикаси

Миллий марказининг

матбуот хизмати